Abuztuaren 15eko bazkalondoa (Literatura)

Alde Zaharreko patio zahar batetik etengabe datozkion zapore bortitzez eta aitaren Montecristoaren usain urdinez inguraturik, Joxe Austin Arrieta, Abuztuaren 15eko Bazkalondoan, bere bizitzaren hainbat zertzelada aletzen hasi zaigu. Hamar kapitulutan zehar, iheska doazkion leku-denborak birreskuratu nahirik dabil. Seminarioko experientziak, adokinez estalitako kaletan zehar "Luzero" zaldiaren atzetik egindako korrikak, haurtzaroko lagunen arteko borroka gordinak... Denborarekin jolasean, oroitzapenen kronologia eta linealtasuna apurtuz, Joxe Austinek umetako gazi-gozoak eskaintzen dizkigu. Bigarren pertsonaren teknika eta Hegoameriketarren barrokotasuna ehotuz, Arrietak hizketa oparoa lortu du. Eta borborka darion mintzaira dastatzen ari garela, kontaketaren ilunabarrarekin batera nobela itzaltzen, agortzen doala dirudi...